திருமாவுக்கு நிகழ்ந்தது நாட்டுக்கே அவமதிப்பு: மருத்துவர் ராமதாசு
கொழும்பு விமான நிலையத்தில் இருந்து திருமாவளவன் திருப்பி அனுப்பப்பட்ட செயல், இந்தியாவுக்கே அவமதிப்பை ஏற்படுத்தியுள்ளதாக பாமக நிறுவனர் ராமதாஸ் கூறியுள்ளார்.
இதுகுறித்து அவர் இன்று வெளியிட்ட அறிக்கையில், "ஈழத் தமிழர்களின் அரசியல், ஜனநாயகம் மற்றும் சம உரிமைகளுக்காகப் போராடிய "போராளி' பிரபாகரனின் தாயார் பார்வதியம்மாளின் இறுதிச் சடங்குகள் இன்று யாழ்ப்பாணம் வல்வெட்டித்துறையில் நடைபெற்றுள்ளது.
இந்த இறுதிச் சடங்கில் அங்குள்ள தமிழர்கள் கலந்து கொள்வதை ராணுவத்தைக் கொண்டு மிரட்டி தடுத்துள்ள ராஜபக்ஷே அரசு, அதற்கும் ஒருபடி மேலாகச் சென்று இந்தியா நாடாளுமன்ற உறுப்பினரும், விடுதலைச் சிறுத்தைகள் கட்சியின் தலைவருமான தொல். திருமாவளவனை அந்த இறுதிச்சடங்கில் கலந்து கொள்ளக்கூடாது என்று தடுத்து நிறுத்தி இந்தியாவுக்குத் திருப்பி அனுப்பியிருக்கிறது.
விமான நிலையத்திலேயே அவர் தடுக்கப்பட்டு சென்னைக்குத் திருப்பி அனுப்பப்பட்டிருக்கிறார். எந்தவொரு கொடுங்கோலாட்சியிலும் நடைபெறாத இந்தக் கொடுமையை வன்மையாகக் கண்டிக்கிறோம்.
தொல். திருமாவளவன் அங்குள்ள ஈழத்தமிழர்களின் உணர்வுகளை தட்டி எழுப்புவதற்காகச் செல்லவில்லை. உலகத் தமிழர்களின் குறிப்பாக தாயகத்து தமிழர்களின் உணர்வுகளை வெளிப்படுத்தும் வகையில் இறுதிச் சடங்கில் கலந்து கொள்ளச் சென்றிருக்கிறார்.
எத்தகைய எதிரிகளாக இருந்தாலும், இதுபோன்ற சமயங்களில் கலந்து கொண்டு இறுதி அஞ்சலி செலுத்துவதற்கு தடையோ, எதிர்ப்போ தெரிவிக்கப்படுவதில்லை; அது நாகரீகமும் இல்லை.
ஆனால், அனைத்து மரபுகளையும், சட்டங்களையும் மதிக்காமல் தமிழர்களை அடக்கி ஒடுக்குவதிலேயே குறியாக இருக்கிற ராஜபக்ஷேவும், அவரது அரசும் இந்தக் கொடுமையை செய்திருப்பதை உலக நாடுகளும், மனித குலமும் மன்னிக்காது.
மேலும், தொல். திருமாவளவன் நாடாளுமன்ற உறுப்பினர் என்ற முறையில் சிறப்பு கடவுச் சீட்டு (டிப்ளமேட்டிக் பாஸ்போர்ட்) பெற்றிருப்பவர். எந்த நாட்டிற்கும் எப்போது வேண்டுமானாலும், செல்வதற்கான அனுமதி வழங்குகிற இந்தச் சிறப்பு கடவுச் சீட்டை பெற்றுள்ள தொல். திருமாவளவனை, அனுமதிக்கமாட்டோம் என்று திருப்பி அனுப்பியிருப்பது இந்திய அரசையும், குறிப்பாக இந்திய வெளியுறவுத்துறையையும் இலங்கை அவமதித்த செயலாகும்.
சென்னை நீதிமன்றம் ஒன்றில் நடைபெற்றுவரும் கொலை வழக்கு ஒன்றில் தேடப்பட்ட குற்றவாளி என்று பிரகடனம் செய்யப்பட்டுள்ள இலங்கை அமைச்சர் ஒருவர் இந்தியாவுக்கு தாராளமாக வந்துபோகிறார்.
ஆனால், இந்திய நாடாளுமன்ற உறுப்பினர் ஒருவர் இலங்கையில் கால்வைக்கக்கூடாது என்று திருப்பி அனுப்பப்பட்டிருப்பது பெரும் அவமானமாகும். இலங்கை அதிபருக்கும், அந்நாட்டு வெளியுறவுத்துறைக்கும் இந்தியா தனது கடும் கண்டனத்தை தெரிவிக்க வேண்டும்.
இதற்கு பதிலடி கொடுக்கும் வகையில் தேடப்பட்ட குற்றவாளி என்று அறிவிக்கப்பட்ட இலங்கை அமைச்சரே, கைது செய்து நீதிமன்றத்தில் நிறுத்த பன்னாட்டு காவல்துறையின் மூலம் இந்திய அரசு நடவடிக்கை எடுக்கவேண்டும் என்று ராமதாஸ் வலியுறுத்தியுள்ளார்.
0 கருத்துகள்:
கருத்துரையிடுக