சர்வதேச நீதிமன்றத்தில் ராஜபக்சேயை நிறுத்த கோரி விடுதலை சிறுத்தைகள் கையெழுத்து இயக்கம்: திருமாவளவன் தொடங்கிவைத்தார்

இலங்கையில் ஈழ தமிழர்களை கொன்று குவித்த ராஜபக்சேயை சர்வதேச நீதிமன்றத்தில் நிறுத்தி தண்டனை வழங்க வேண்டும் என்று வலியுறுத்தும் வகையில் விடுதலை சிறுத்தைகள் சார்பில் கையெழுத்து இயக்கம் தொடங்கப்பட்டது.   கட்சி தலைவர் திருமாவளவன் கையெழுத்திட்டு இதை தொடங்கி வைத்தார்.
~

பின்னர் அந்த கையெழுத்து படிவங்களை கட்சி நிர்வாகிகளுக்கு வழங்கினார். சுமார் 10 லட்சம் பொதுமக்களிடம் கையெழுத்து வாங்கி ஐ.நா.சபைக்கு அனுப்பி வைக்கப்படுகிறது.

இதுகுறித்து திருமாவளவன் சென்னையில் நிருபர்களிடம் கூறியதாவது:-

இனப்படுகொலையை செய்த ராஜபக்சேயை சர்வதேச நீதிமன்றத்தில் நிறுத்தி தண்டிக்கும் வகையில் சுமார் 10 லட்சம் பேரிடம் கையெழுத்து பெறப்படும். கிராமம் கிராமமாக சென்று சேனல் 4 தொலைக்காட்சி வெளியிட்ட இலங்கை கொலை களம் என்கிற குறுங்தகடுகளை ஒளிபரப்பி இந்த கையெழுத்து இயக்கத்தை நடத்த இருக்கிறோம்.

~
அமெரிக்க, ஐரோப்பிய நாடுகள் சிங்கள அரசு போர்க்குற்றம் செய்துள்ளதாக ஐ.நா. சபை அறிவித்ததை ஆதரித்துள்ளது. ஆனால் சீனா, கியூபா போன்ற ஒரு சில நாடுகள் இதற்கு எதிர்ப்பு தெரிவித்துள்ளன. இந்திய அரசு இலங்கைக்கு எதிரான ஐ.நா. அறிக்கையை ஆதரிக்க வலியுறுத்தும் வகையில் இந்த மக்கள் இயக்கம் கொண்டு செல்லப்படும்.  

`
ஈழத்தமிழர் பிரச்சினையில் மத்திய அரசு வேடிக்கை பார்க்கிறது. இதை விடுதலை சிறுத்தை வன்மையாக கண்டிக்கிறது. தமிழகத்தில் சமச்சீர் கல்வியை நடைமுறைப்படுத்த மனம் இல்லாமல் சாக்குபோக்கு சொல்லி தரமற்ற கல்வி என கூறி தவிர்த்து வருகிறது. இதனால் 2 மாதமாக மாணவர்கள் பாதிக்கப்படுகிறார்கள். ஏழை-எளிய, வசதி படைத்த மாணவர்கள் சமமான கல்வியை பெற சமச்சீர் கல்வியை கொண்டு வர வேண்டும். புதிய தலை முறையை சமத்துவ சிந்தனையுடன் வளர்க்க இது உதவும்.  

`
இந்த திட்டத்தை செயல்படுத்த மறுப்பதால் சமச்சீர் கல்வியை கொண்டு வருவதற்கு மனம் இல்லையோ என்று எண்ணத் தோன்றுகிறது. இலவச திட்டங்களை கைவிட வேண்டும். தி.மு.க. ஆட்சியிலும் இதை நான் வலியுறுத்தினேன். கல்வியை மட்டும் இலவசமாக வழங்க வேண்டும். மது கடைகளை மூட வேண்டும். இதனால் மாணவர்கள் குடிப்பழக்கத்திற்கு ஆளாகிறார்கள்.

`
தற்போதுள்ள தேர்தல் முறையை சீர்படுத்த வேண்டும். விகிதாச்சார பிரதிநிதித்துவ முறையை நடைமுறைப்படுத்த வேண்டும். இது கொண்டு வரப்பட்டால் தேர்தலுக்கு முன்பு கட்சிகள் கூட்டணி வைக்கும் நிலை ஏற்படாது.

`
தமிழ்நாடு முழுவதும் தலித் பஞ்சாயத்து தலைவர்கள் தாக்கப்படுகிறார்கள். இதன்மீது நடவடிக்கை எடுக்க வேண்டும். பணி நியமன தடை சட்டத்தால் பாதிக்கப்பட்ட இளைஞர்களுக்கு வயது வரம்பு சலுகையை நீட்டிக்க வேண்டும்.  

மணல் கொள்ளையை தடுக்க வேண்டும். நில அபகரிப்பு செய்தவர்கள் மீது நடவடிக்கை எடுக்க தனி பிரிவு தொடங்கப்பட்டதை வரவேற்கிறேன். ஆனால் அரசியல் ரீதியாக பழி வாங்ககூடாது. உள்ளாட்சி தேர்தலில் யாருடன் கூட்டணி என்பது பற்றி தேர்தல் நேரத்தில் முடிவு செய்வோம். இலங்கை பிரச்சினைக்காக தொடர்ந்து போராட எனது தலைமையை ஏற்க தயாராக இருந்தால் அவர்களுடன் இணைந்து செயல்படுவோம்.

இவ்வாறு அவர் கூறினார்.

`
கையெழுத்து இயக்க நிகழ்ச்சியில் நிர்வாகிகள் சிந்தனைசெல்வன், வன்னி அரசு, பாவரசு, கவுதம சன்னா, பாவலன், மணியரசு, வெற்றிசெல்வன், பாலாஜி, சேகுவாரே, இரா.செல்வம், பழனிமுத்து உள்பட பலர் கலந்து கொண்டனர்.

பத்திரிக்கையாளர் சந்திப்பின் காணொளி