முத்துக்குமாரின் கனவை நனவாக்குவது பிரபாகரன் கனவை நனவாக்குவது போன்றது: திருமா

முத்துக்குமாரின் கனவை நனவாக்குவது பிரபாகரன் கனவை நனவாக்குவது போன்றதாகும் என, திருமாவளவன் கூறினார்.

ஈழத்தமிழர்களுக்காக தீக்குளித்து உயிர் நீத்த முத்துக்குமாரின் 2ம் ஆண்டு நினைவு தினம் இன்று கடைபிடிக்கப்பட்டது. கொளத்தூரில் முத்துக் குமார் உடல் வைக்கப்பட்டிருந்த இடத்தில் மலர்களால் அலங்கரிக்கப்பட்ட தற்காலிக நினைவுத்தூண் ஒன்று அமைக்கப்பட்டுள்ளது.

விடுதலை சிறுத்தைகள் கட்சி தலைவர் தொல். திருமாவளவன் அஞ்சலி செலுத்தினார். அவருடன் வன்னி அரசு, இரா. செல்வம் உள்ளிட்ட ஏராளமான சிறுத்தைகள் கலந்து கொண்டனர்.

பின்னர் அவர் கூறியதாவது: ஈழத்தமிழர்களுக்காக உயிர் நீத்த முத்துக்குமாரின் நினைவை நனவாக்குவது நமது கடமை. தமிழ் ஈழத்தை வென்றெடுக்க இந்நாளில் தமிழர்கள் அனைவரும் உறுதி எடுத்துக்கொள்ள வேண்டும். முத்துக்குமாரின் கனவை நனவாக்குவது பிரபாகரன் கனவை நனவாக்குவது போன்றதாகும் என்றார்.

விடுதலைச் சிறுத்தைகள் கட்சி சார்பில் தமிழகம் முழுவதும் முத்துக்குமார் நினைவேந்தல் வீரவணக்க நிகழ்வுகள் நடைபெற்றன.