திருச்செந்தூரில் விடுதலைச் சிறுத்தைகள் சார்பில் முத்துக்குமார் வெண்கலச் சிலை தலைவர் தொல். திருமாவளவன் திறந்து வைக்கிறார்!

 தமிழீழ மக்களுக்கு எதிரான சிங்கள இனவெறிப் போரைத் தடுத்து நிறுத்தக் கோரி தீக்குளித்து வீரச்சாவடைந்த கரும்புலி முத்துக்குமாரின் இரண்டாம் ஆண்டு நினைவேந்தல் மற்றும் வெண்கலத் திருவுருவச் சிலை திறப்பு நிகழ்வு, நாளை சனவரி 29ஆம் நாள், மாலை 6 மணியளவில் அவரது சொந்த ஊரான திருச்செந்தூரில் விடுதலைச் சிறுத்தைகள் சார்பில் நடைபெறுகிறது.

நிகழ்ச்சிக்கு கரும்புலி முத்துக்குமார் பாசறையின் முதன்மைச் செயலாளர் ம.சங்கத்தமிழன் தலைமை ஏற்கிறார். பொதுச் செயலாளர்கள் சிந்தனைச்செல்வன், இரவிக்குமார், கா.கலைக்கோட்டுதயம், பொருளாளர் முகம்மது யூசுப், ஆற்றலரசு ஆகியோர் முன்னிலை வகிக்கின்றனர். தூத்துக்குடி புற நகர் மாவட்டச் செயலாளர் சொ.சு. தமிழினியன் வரவேற்புரையாற்றுகிறார். கட்சியின் தலைவர் எழுச்சித் தமிழர் தொல். திருமாவளவன் அவர்கள் சிலையைத் திறந்து வைத்து வீரவணக்க நினைவுரையாற்றுகிறார். முத்துக்குமாரின் பாட்டியார் திருமதி லிங்கபுஷ்பம் ஈகச் சுடரை ஏற்றிவைக்கிறார். தூத்துக்குடி மாநகர் மாவட்டச் செயலாளர் ஆறுமுக நயினார் நன்றியுரையாற்றுகிறார்.

நிகழ்ச்சியில் கலைநிகழ்ச்சிகளும் இசை நிகழ்ச்சிகளும் நடைபெறவுள்ளன. தமிழகம் முழுவதும் இருந்து விடுதலைச் சிறுத்தைகள் பல்லாயிரக் கணக்கில் வந்து கலந்துகொள்ளவுள்ளனர். நிகழ்ச்சியை கரும்புலி முத்துக்குமார் பாசறை ஒருங்கிணைக்கிறது.


இவண்

வன்னிஅரசு